Take a fresh look at your lifestyle.

Pune Metro : मुठा नदीच्या 100 फूट खालून धावली मेट्रो ! जिल्हा न्यायालय – मंडई ते स्वारगेटपर्यंत करता येणार प्रवास, पहा रूट मॅप..

कालचा दिवस केवळ पुणे मेट्रोसाठी नाही तर, ट्राफिकला वैतागलेल्या, त्रासलेल्या पुणेकरांसाठी सुद्धा महत्वाचा ठरला आहे. पुणे मेट्रोची काल सिव्हिल कोर्ट ते स्वारगेट अशी यशस्वी ट्रायल रन पार पडली..

पुण्याच्या पोटातून म्हणजेच मुळा मुठा नदीच्या खालून शंभर फूट खाली असलेल्या बोगद्यातून मेट्रो स्वारगेटला पोहोचली. देशाच्या इतिहासात पहिल्यांदाच अशा प्रकारे नदीपात्राखालून मेट्रो धावण्याची ऐतिहासिक घटना घडली आहे.

पुणे मेट्रोचे 98 टक्के काम पूर्ण झाल्याचा दावा प्रशासनाने केला आहे. लवकरच काम पूर्ण होऊन मेट्रोने थेट मंडई, स्वारगेट पर्यत प्रवास करता येणार, ही बातमी प्रवाशांसाठी खूपचं सुखावणारी आहे.

अशी झाली ट्रायल रन यशस्वी..

जिल्हा न्यायालय स्टेशनतून मेट्रो गाडीची टेस्ट सकाळी 10 वाजून 58 मिनिटांनी सुरू झाली. बुधवार पेठ स्टेशन आणि मंडई स्टेशन पार करून मेट्रो गाडी 11 वाजून 59 मिनिटांनी स्वारगेट स्टेशनमध्ये पोहोचली. जिल्हा न्यायालय स्टेशन ते बुधवार पेठ स्टेशन अंतर 853 मीटर, बुधवार पेठ स्टेशन ते मंडई स्टेशन अंतर 1 किलोमीटर आणि मंडई स्टेशन ते स्वारगेट स्टेशन अंतर 1.48 किलोमीटर आहे. एकूण 3.64 किलोमीटर मार्गावर मेट्रोची ट्रायल रन घेण्यात आली. या रन साठीएक तास वेळ लागला.

आता, पहिल्या टप्पाच काम अर्धवट असताना, पंतप्रधान नरेंद्र मोदी यांच्या हस्ते हिरवा झेंडा दाखवुन मेट्रो सुरु केली होती. अगदी तसचं 98 टक्के काम पूर्ण झालं असलं तरी पंतप्रधान नरेंद्र मोदी यांच्याच हस्ते हिरवा झेंडा दाखवून ताबडतोब मेट्रो स्वारगेट पर्यत सुरु करावी ही मागणी पुणे आणि पिंपरी चिंचवडकरांनी केली आहे.

रुबी हॉल क्लिनिक ते रामवाडी मेट्रोचे होणार उद्घाटन..

पुणे मेट्रो लाईन – मधील रुबी हॉल क्लिनिक ते रामवाडी विभागाचे उद्घाटन करण्यासाठी पंतप्रधान नरेंद्र मोदी फेब्रुवारीच्या दुसऱ्या पंधरवड्यात पुण्यात येण्याची शक्यता आहे. याबरोबरच स्वारगेटपर्यतचेही उदघाटन होणार आहे. मेट्रो रेल्वे सुरक्षा आयुक्त (CMRS) ने गेल्या आठवड्यात विभागाची अंतिम तपासणी पूर्ण केली आणि व्यावसायिक ऑपरेशनसाठी मंजुरी देण्यापूर्वी किरकोळ निरीक्षणांचे पालन करण्याची मागणी केली आहे.

पुणे मेट्रो रेल्वे प्रोजेक्टच्या पहिल्या टप्प्यात दोन कॉरिडॉर, उत्तर – दक्षिण कॉरिडॉर (पर्पल लाईन) आणि पूर्व-पश्चिम कॉरिडॉर (एक्वा लाईन) यांचा समावेश आहे, ज्याची एकूण लांबी 33.1 किमी आणि 30 स्टेशन्स आहेत. पिंपरी चिंचवड महानगरपालिका (PCMC) ते स्वारगेट पर्यंत 17.4 किमीचा उत्तर – दक्षिण कॉरिडॉर, 14 स्टेशन्स (नऊ एलिव्हेटेड आणि पाच अंडरग्राउंड), हा रूट पिंपरी – चिंचवडच्या औद्योगिक क्षेत्रातून आणि पुणे शहरातील जुनी पेठ परिसरातून जातो.

सध्या ही लाईन पिंपरी ते जिल्हा न्यायालयपर्यंत सुरू आहे. जिल्हा न्यायालय ते स्वारगेट या सुमारे 3.7 किमी लांबीच्या प्रलंबित रस्त्याचे उद्घाटन मार्चमध्ये होणे अपेक्षित आहे. त्याचप्रमाणे, पश्चिमेकडील वनाज ते पूर्वेकडील रामवाडीपर्यंत पसरलेला पूर्णत: एलिव्हेटेड कॉरिडॉर 15.7 किमीचे अंतर व्यापतो आणि 16 स्थानके व्यापतो..

सध्या, वनाज ते रुबी क्लिनिकपर्यंत ही लाईन चालू आहे, रुबी क्लिनिक ते रामवाडी या उरलेल्या 5.5 किमी लांबीच्या उदघाटनाच्या तयारीत आहे. ऑक्टोबर 2023 मध्ये महाराष्ट्र मेट्रो रेल कॉर्पोरेशन लिमिटेड (mahametro) ने रुबीचे काम पूर्ण केल्याची घोषणा केली आहे. क्लिनिक ते रामवाडी विभाग चाचणी केली. त्यानंतर, सीएमआरएस टीमने या वर्षी जानेवारीच्या दुसऱ्या आठवड्यात पहिली तपासणी पूर्ण केली.

पूर्ण झाल्यावर, दोन्ही कॉरिडॉर वनाझ ते रामवाडी आणि PCMC ते स्वारगेट पर्यंत अखंड प्रवासाचा अनुभव देतील – मेट्रोचे एकूण अंतर सध्याच्या 24 किमी वरून 33.1 किमी पर्यंत वाढणार आहे.