Take a fresh look at your lifestyle.

Rupee नंतर RBI चा राज्यातील आणखी एका बँकेला झटका ; परवाना केला रद्द, पहा, ग्राहकांच्या पैशांचं नेमकं काय होणार ?

शेतीशिवार टीम : 23 सप्टेंबर 2022 :- भारतीय रिझर्व्ह बँकेने (RBI) गुरुवारी राज्यातील एका सहकारी बँकेचा परवाना रद्द केला. RBI ने दोन दिवसांपूर्वीच रुपी को-ऑपरेटिव्ह बँक लिमिटेड (Rupee Co-operative Bank Ltd, Pune), पुणेचा परवाना रद्द केला असून आता राज्यातील आणखी एका बँकेचा परवाना रद्द झाल्याने झटका बसला आहे.

भारतीय रिझर्व्ह बँकेने लक्ष्मी सहकारी बँक लिमिटेड, (The Laxmi Co-operative Bank) सोलापूर, महाराष्ट्राचा परवाना रद्द करण्याचा निर्णय घेतला आहे. परंतु, भारतीय रिझर्व्ह बँकेच्या घोषणेनंतरही, बँकेच्या ग्राहकांना 5 लाख रुपयांपर्यंतचा क्लेम करण्याची सुविधा दिल्याने दिलासा मिळाला आहे.

RBI बँकेच्या विधानानुसार, सहकारी बँक बँकिंग नियमन कायदा, 1949 च्या आवश्यकतांचे पालन करण्यात लक्ष्मी सहकारी बँक अयशस्वी ठरली आहे, त्यामुळे तिला चालू ठेवणे तिच्या ठेवीदारांच्या हितासाठी घातक असल्याचं म्हटलं आहे.

ही बँक आर्थिक दिवाळखोरीत निघाली असून सध्याची आर्थिक स्थिती बिकट असून ती सध्याच्या ठेवीदारांना पूर्ण देय देऊ शकणार नाही, असेही RBI ने म्हटले आहे. बँकेचा परवाना रद्द केल्यावर, बँकेला ‘बँकिंग’चा व्यवसाय करण्यास मनाई आहे, ज्यामध्ये ठेवी स्वीकारणे आणि ठेवींची परतफेड करणे समाविष्ट आहे.

ग्राहकांकडे आता हा पर्याय शिल्लक :-

ज्या ग्राहकांचे पैसे महाराष्ट्र लक्ष्मी को-ऑपरेटिव्ह बँकेत ठेवीच्या स्वरूपात जमा आहेत त्यांनी घाबरून जाण्याची गरज नाही. कारण बँकेच्या ग्राहकांना RBI ची उपकंपनी DICGC (डिपॉझिट इन्शुरन्स आणि क्रेडिट गॅरंटी कॉर्पोरेशन) च्या वतीने आर्थिक सहाय्य दिलं जाणार आहे.

RBI बँकेने स्पष्ट केले आहे की, 5 लाख रुपयांपर्यंतच्या ठेवींवर ग्राहकांचा संपूर्ण क्लेम DICGC द्वारे केला जाईल. मात्र यापेक्षा जास्त ठेवींवर ग्राहकांना पूर्ण पैसे मिळू शकणार नाहीत. केवळ 5 लाख रुपयांपर्यंतच नुकसान भरपाई मिळू शकते…

तसेच दि.13 सप्टेंबर 2022 पर्यंत, DICGC ने बँकेच्या संबंधित ठेवीदारांकडून प्राप्त झालेल्या इच्छेच्या आधारावर DICGC कायदा, 1961 च्या कलम 18- च्या तरतुदींनुसार एकूण विमा उतरवलेल्या ठेवींपैकी 193.68 कोटी आधीच क्रेडिट केले आहे.