99,999 रुपये प्रति किलो विकला गेला आसामचा हा ‘गोल्डन चहा’ ; जाणून घ्या खासियत…

शेतीशिवार टीम,16 डिसेंबर 2021 :- जगभरातील जवळपास सगळेच लोक त्यांच्या सकाळची सुरुवात चहाच्या कपाने करतात. अन् हिवाळ्यात तर गरमागरम चहा पिण्याची वेगळीच मजा असते. अशाप्रकारे प्रत्येकाच्या घरात ‘चहा’ ठेवला जातो, पण असा चहा तुम्ही कधी घेतला आहे का, ज्याची किंमत 1 लाख रुपयांच्या जवळपास आहे.

आसाममधील चहाच्या खास जाती असलेल्या मनोहरी गोल्ड टीने (Manohari Gold Tea) पुन्हा एकदा स्वतःचा विक्रम मोडला आहे. मनोहरी गोल्ड टीने 99,999 रुपये प्रति किलो दराने लिलाव करून विक्रम केला आहे.

चहाच्या खरेदी-विक्रीबद्दल बोलायचं झालं तर आतापर्यंतचा सर्वाधिक लिलाव मनोहरी गोल्ड टीचा (Manohari Gold Tea) झाला आहे. या चहाची खासियत काय आहे ते जाणून घेऊयात…

मनोहरी गोल्ड टी (Manohari Gold Tea) हा त्याच्या पानांपासून नव्हे तर लहान कळ्यापासून तयार केला जातो, त्यामुळे त्याची किंमत जास्त असते. मनोहरी गोल्ड टी त्याच्या चव, मजबूत आणि चमकदार रंगासाठी ओळखला जातो.

या चहाची पाने तयार झाल्यानंतर सोनेरी रंग येतो. ऑक्सिडेशनमुळे या प्रक्रियेदरम्यान रंग हिरव्यापासून ते तपकिरी होतो आणि कळ्या सुकल्यावर सोनेरी रंगाच्या होतात आणि नंतर त्या काळ्या पानांपासून वेगळ्या केल्या जातात.

हे लक्षात घेण्यासारखे आहे की 2019 मध्ये, GTAC लिलावात मनोहारी गोल्ड टी 50,000 रुपये प्रति किलो या दराने विकला गेला होता, जी त्या वेळी लिलावाची सर्वोच्च किंमत होती.

मात्र, हा विक्रम एका महिन्यातच मोडला, जेव्हा अरुणाचल प्रदेशातील डोनी पोलो टी इस्टेटने उत्पादित केलेला ‘गोल्डन नॅडल्स टी’ आणि आसाममधील डायकॉन टी इस्टेटचा ‘गोल्डन बटरफ्लाय टी’ 75,000 रुपये प्रति किलो दराने वेगवेगळ्या लिलावात गेला.

2018 मध्ये याच मळ्यातील हा चहा सर्वात महागडा लिलाव होता. मनोहरी गोल्ड टी राज्याच्या या चहाची किंमत प्रति किलो 39, 001 रुपये निश्चित करण्यात आली होती. सन 2021 मध्ये हा चहा 99,999 रुपये प्रति किलो दराने विकला गेला असून, सर्व विक्रम मोडले आहेत.