Budget 2023 : अर्थसंकल्पात करदात्यांना लागणार लॉटरी..! तब्बल 15,000 रुपयांचा होणार फायदा

अर्थमंत्री निर्मला सीतारामन 1 फेब्रुवारी 2023 रोजी सर्वसाधारण अर्थसंकल्प सादर करणार आहेत. यावेळी सर्वच विभागांना सर्वसाधारण अर्थसंकल्पाकडून मोठ्या अपेक्षा आहेत. पण यावेळी देशातील पगारदारांना सामान्य अर्थसंकल्पात मोठी बातमी मिळू शकते. अशी चर्चा आहे की, सरकार पगारदार व्यक्तींसाठी 80C अंतर्गत केलेल्या गुंतवणुकीवर सूट मर्यादा वाढवू शकते. पगारदार वर्गासाठी कर वाचवण्यासाठी कलम 80C हा सर्वात महत्त्वाचा विभाग आहे. या कलमांतर्गत सूट मर्यादा वाढवली म्हणजे अधिकाधिक लोकांना दिलासा मिळू शकतो.

सध्या, कलम 80 C अंतर्गत उपलब्ध सूट 1.5 लाख रुपये आहे. अशी चर्चा आहे की, बजेट 2023 मध्ये, सरकार कलम 80C अंतर्गत कपातीची मर्यादा वार्षिक 200,000 रुपये करू शकते. सरकार थेट कपातीची मर्यादा 50,000 रुपयांनी वाढवू शकते. तसे झाल्यास पगारदार वर्गाला मोठा दिलासा मिळू शकतो. आपण जाणून घेणार आहोत की, जर तुमचा पगार 10 लाख रुपये असेल अन् कपातीची मर्यादा वाढवली तर तुमचे किती पैसे वाचतील ?

आयकर कायद्याचे कलम 80 C नेमकं काय आहे ?

भारतीय आयकर कायद्याचे कलम 80 C आणि त्यासंबंधित कलम 80 CCC, 80 CCD आहेत. या अंतर्गत कोणत्याही व्यक्तीला एका आर्थिक वर्षात 1.5 लाख रुपयांपर्यंत कर सूट मिळू शकते. ही सूट कंपनी, कॉर्पोरेट आणि पार्टनरशिप इत्यादींमध्ये उपलब्ध नाही. या सूटसाठी तुम्ही दरवर्षी 31 जुलैपूर्वी आयकर रिटर्न भरू शकता.

कलम 80 C म्युच्युअल फंड, प्रीमियम इन्शुरन्स टॅक्स- सेव्हर फिक्स्ड डिपॉझिट्स, पब्लिक प्रॉव्हिडंट फंड (PPF) इत्यादी सेवांचा समावेश करते. पेन्शन आणि अँन्युइटी देणाऱ्या काही पॉलिसी कलम 80 CCC अंतर्गत येतात. इंडियन पेन्शन सिस्टम (NPS) 80 CCD अंतर्गत येते.

कपातीची मर्यादा (Deduction Limit) वाढवल्यास किती पैसे वाचतील ? ते जाणून घ्या..

यावेळी सरकार सामान्य अर्थसंकल्पात पगारदारांना खूश करण्याची तयारी करत असल्याची जोरदार चर्चा आहे. अर्थसंकल्प 2023 मध्ये, सरकार कलम 80 C अंतर्गत कपातीची मर्यादा वार्षिक 200,000 रुपयांपर्यंत वाढवू शकते. असे झाल्यास पगारदारांचे किती पैसे वाचतील?

हे अशा प्रकारे समजून घ्या की, तुम्ही या विभागाद्वारे जी काही रक्कम दावा करता, ती तुमच्या एकूण उत्पन्नातून कमी केली जाते. आयकर सहज मोजता यावा म्हणून हे केलं जातं. आता जर एखाद्याचा एकूण पगार 10 लाख रुपये आहे. यापैकी प्रत्येकाला अडीच लाख रुपयांची करसवलत मिळते. 50,000 रुपयांची मानक वजावट (Standard Deduction) ची सुविधा मिळते.

यामध्ये करपात्र उत्पन्न 7 लाख रुपये आहे. आता जर तुम्ही कलम 80 C द्वारे 1.5 लाख रुपयांच्या कपातीचा दावा केला तर तुमचे करपात्र उत्पन्न (करपात्र) रुपये 5.5 लाख होईल. दुसरीकडे, कपातीची मर्यादा 1.5 लाख रुपयांवरून 2 लाख रुपयांपर्यंत वाढवल्यास, कलम 80 C द्वारे 2 लाख रुपयांच्या कपातीचा दावा केला जाईल.

त्यावेळी 10 लाख रुपये पगार असलेल्या व्यक्तीचे करपात्र उत्पन्न 5 लाख रुपये असेल. सध्याच्या आयकर स्लॅबमध्ये 2.5 ते 5 लाख वार्षिक उत्पन्नावर 5% कर आकारला जातो. अशा परिस्थितीत, कपातीची मर्यादा वाढवल्यास, 10 लाख रुपये उत्पन्न असलेल्या पगारदार व्यक्तीसाठी 2500 रुपयांची अधिक बचत होईल.