वाहतूक कोंडीवर BMC चा मास्टरप्लॅन ! 2100 कोटींचा खर्च, 4 वर्षात ‘या’ 14 ठिकाणी होणार एलिवेटेड रोडसह नवे फ्लायओव्हर…

मुंबईतील वाहतूक व्यवस्था सुधारण्यासाठी बीएमसी (BMC) ने मास्टर प्लॅन तयार केला असून या योजनेंतर्गत जुन्या पुलांऐवजी नवीन पूल बांधण्यावर भर दिला जात आहे. मार्च 2023 ते डिसेंबर 2027 या कालावधीत मुंबईकरांना ये – जा करण्यासाठी 14 नवीन एलिवेटेड रोडसह नवे फ्लायओव्हर बांधण्यात येणार आहे.

तसेच, BMC 9 मोठ्या पुलांमध्ये मोठ्या प्रमाणात स्ट्रक्चरल बदल करत आहे, तर 16 पुलांमध्ये दुरुस्तीचे काम केले जात आहे. हे सर्व पूल लवकरच मुंबईकरांसाठी उपलब्ध होणार आहेत. BMC च्या मागील अर्थसंकल्पात पुलासाठी 1370 कोटी रुपयांची तरतूद करण्यात आली होती. त्याचबरोबर यंदा त्यात 700 कोटींची वाढ करण्यात आली आहे.

यंदाच्या बजेटमध्ये पुलासाठी 2100 कोटी रुपये ठेवण्यात आले आहेत. अंधेरी पूर्व येथील तेली गली पुलाचे 95 ​% काम पूर्ण झालं असून, मार्चमध्ये तो वाहनांच्या वाहतुकीसाठी खुला करण्यात येणार आहे. अंधेरी पूर्व आणि पश्चिमेला जोडणाऱ्या गोखले पुलाचे काम या वर्षी सप्टेंबरमध्ये पूर्ण होणार आहे.

मुंबईत उड्डाणपुलांचे जाळं निर्माण होणार..

विद्या विहार आणि विक्रोळी रेल्वे स्थानक उड्डाणपुलांचे 50% काम पूर्ण झालं आहे, जे अनुक्रमे मे आणि सप्टेंबरमध्ये लॉन्च करण्याचे नियोजन आहे. दिल्ली रोडवर असलेल्या रेल्वे पुलाकडे जाणाऱ्या रस्त्याचे 60% काम पूर्ण झालं आहे, तो ऑक्टोबरमध्ये उघडला जाणार आहे.

राम मंदिर रोड ते मृणालताई गोरे उड्डाणपुलाजवळील रिलीफ रोडपर्यंत विस्तारित उड्डाणपुलाचे काम डिसेंबर 2023 पर्यंत पूर्ण होणार आहे. मालाडमधील लिंक रोडवरील मिठी चौकी जंक्शन येथे बांधण्यात येत असलेल्या उड्डाणपुलाचे 20% काम पूर्ण झाले असून, त्याचे काम ऑक्टोबर 2023 पर्यंत पूर्ण होणे अपेक्षित आहे. केशवराव खाड्ये मार्ग ते सात रास्ता जंक्शन आणि डॉ. ई मोसेस रोड ते सात रास्ता जंक्शन यांना जोडणाऱ्या पुलाचे 10% काम पूर्ण झालं आहे.

हा प्रकल्प मार्च 2024 पर्यंत पूर्ण होईल, असा दावा बीएमसीने केला आहे. एसव्ही रोड कोरा सेंटर येथील पुलाचे काम पूर्ण झाल्यानंतर पश्चिम एक्सप्रेस – वे वरील पुलाचे काम सुरू आहे. त्याचे काम नोव्हेंबर 2024 पर्यंत पूर्ण होणे अपेक्षित आहे. तसेच ई मोझेस रोड ते डॉ. अँनी बेझंट रोडपर्यंत नेहरू सायन्स सेंटरला लागून असलेल्या नाल्यावर पुलाचे काम करण्यात येणार असून नेहरू तारांगण आणि नेहरू सेंटर यांना जोडण्यासाठी भुयारी मार्ग बांधण्यात येणार आहे. त्याचे काम नोव्हेंबर 2025 पर्यंत पूर्ण होणे अपेक्षित आहे.

नवे एलिव्हेटेड रोड्स तयार केले जाणार..

ईस्टर्न फ्रीवेच्या दोन्ही बाजूला भक्ती पार्क कॉम्प्लेक्स ते जिजामाता चौक दरम्यान एलिव्हेटेड रोड तयार करण्यात येणार आहे. त्याचे कामही नोव्हेंबर 2025 मध्ये पूर्ण होईल. महालक्ष्मी रेल्वे स्थानकाजवळील केबल स्टेड ब्रिज सात रस्ता ते एस ब्रिज जंक्शनपर्यंत धावेल, जो पश्चिमेला हाजी अली जंक्शनपर्यंत विस्तारेल. हा पूल मे 2026 पर्यंत तयार होणे अपेक्षित आहे.

अंधेरी पश्चिम येथील जेव्हीपीडी जंक्शन येथे जुहू वर्सोवा लिंक रोड ते सीडी बर्फीवाला रोडपर्यंत पूल बांधण्यात येणार आहे. हा पूल ऑक्टोबर 2027 पर्यंत पूर्ण होणे अपेक्षित आहे.

अंधेरी पश्चिम आणि गोरेगाव सीमेदरम्यानच्या खाडीवर भगतसिंग नगरजवळ पूल बांधण्यात येणार आहे, जो डिसेंबर 2027 पर्यंत तयार होईल. तसेच पश्चिम द्रुतगती महामार्गाला सेनापती बापट मार्गाशी जोडण्यासाठी पूल बांधण्यात येणार आहे. दहिसर ते भाईंदर दरम्यानचा एलिव्हेटेड रस्ता, दादर येथील टिळक पूल, रे रोड रेल्वे पूल आणि भायखळा पूर्व पूल यांची पुनर्बांधणी केली जाणार आहे.